💥जंगल भ्रमण सफारी साठी अंबाबरवा अभयारण्य आजपासून सुरू💥

💥जंगल भ्रमण सफारी साठी अंबाबरवा अभयारण्य आजपासून सुरू💥 

जळगाव जामोद 

 (अभिजीत डोंगरे) : मागील तीन

 महिन्यांपासून बंद असलेली अंबाबरवा अभयारण्यातील जंगल सफारी ऑक्टोबरपासून पुन्हा सुरू करण्यात आली आहे. नॅशनल टायगर कन्झर्वेशन अथॉरिटीच्या मार्गदर्शनानुसार, दरवर्षी १ जुलै ते ३० सप्टेंबर या कालावधीत व्याघ्र प्रकल्पांच्या कोअर क्षेत्रातील पर्यटन बंद ठेवले जाते. त्या अनुषंगाने जुलै, ऑगस्ट व सप्टेंबरमध्ये अंबाबरवा अभयारण्य बंद होते.

आता जंगल सफारी सुरू झाल्याने निसर्गप्रेमी व वन्यजीव रसिकांना पुन्हा एकदा निसर्गरम्य वातावरणाचा आणि वन्यजीवांचा जवळून अनुभव घेण्याची संधी मिळणार आहे.

यासंदर्भात वन्यजीव विभागाकडून स्पष्ट करण्यात आले आहे. अंबाबरवा अभयारण्य १५ हजार ८३९.७५ हेक्टर क्षेत्रफळावर विस्तारले असून येथे वाघ, बिबट, अस्वल, नीलगाय, सांबर, भेडकी, गवा, रानडुक्कर, लंगूर, माकड, रानकोंबडी, रानमांजर, ससा, सायाळ, मोर आदी प्रजातींचे वास्तव्य आहे. याशिवाय दुर्मीळ काळ्या पंखाचा कोकीळ-खाटीकसह विविध दुर्मीळ पक्ष्यांची नोंद या अभयारण्यात झाली आहे. सातपुड्याच्या दऱ्या-खोऱ्यात वसलेले हे अभयारण्य दुर्मीळ वनस्पती आणि ऐतिहासिक वारशामुळेही विशेष महत्त्वाचे मानले जाते. जंगल सफारीसाठी येणाऱ्या पर्यटकांना सोयीसाठी ऑनलाइन बुकिंगची सुविधा उपलब्ध करून देण्यात आली आहे.