दिव्यांग अधिकारी कर्मचाऱ्यांच्या मागण्यांसाठी संघटनेचे जिल्हाधिकाऱ्यांना निवेदन सादर

*दिव्यांग अधिकारी कर्मचाऱ्यांच्या मागण्यांसाठी दिव्यांग कर्मचारी संघटनेचे माननीय जिल्हाधिकारी यांना निवेदन सादर.

बुलढाणा | 26 मे 2025

शासन मान्यता प्राप्त महाराष्ट्र राज्य अपंग कर्मचारी संघटना, मुंबई जिल्हा शाखा बुलढाणा यांच्यातर्फे  दिनांक 26 मे 2025 रोजी मा. जिल्हाधिकारी, बुलढाणा यांना निवेदन सादर करण्यात आले. या निवेदनात दिव्यांग अधिकारी, कर्मचारी आणि शिक्षकांच्या न्याय्य व प्रलंबित मागण्यांचा पाढा मांडत प्रशासनाकडून वारंवार होत असलेल्या दुर्लक्षाविरोधात निवेदन  देण्यात आले.

ठळक मुद्दे:

1. दिव्यांग ग्रामसेवकास झालेली मारहाण:

असोला बु  तालुका चिखली येथील  दिव्यांग ग्रामसेवक एस एस सवडतकर यांना  नुकतीच झालेली मारहाणीची घटना अत्यंत गंभीर असून, संबंधित आरोपींवर कठोर कायदेशीर कारवाई करण्यात यावी, अशी ठाम मागणी संघटनेने केली. दिव्यांग कर्मचाऱ्यांवरील कोणत्याही प्रकारचा अन्याय सहन केला जाणार नाही, असा इशाराही यावेळी देण्यात आला.

2. दिव्यांग तक्रार निवारण समितीचा अभाव – RPWD कायदा कलम 23 नुसार:

दिव्यांग व्यक्ती हक्क संरक्षण कायदा 2016 (RPWD Act) अंतर्गत कलम 23 नुसार प्रत्येक जिल्ह्यात दिव्यांग तक्रार निवारण समितीची स्थापना बंधनकारक आहे. परंतु बुलढाणा जिल्ह्यात सदर समिती चे कार्य दिसून येत नाही, हे अत्यंत खेदजनक आहे. परिणामी, दिव्यांग कर्मचाऱ्यांच्या तक्रारी वेळेत नोंदवल्या जात नाहीत आणि त्यांना न्याय मिळत नाही.

3. प्रशासनाचे दुर्लक्ष – 

संघटनेने स्पष्टपणे नमूद केले की, शासन निर्णयानुसार दिव्यांग पदाची परीगनना 2016 पासून करून स्वतंत्र ज्येष्ठता यादी तयार कराव्यात व पदोन्नती देण्यात यावी. तसेच इतर  दिव्यांग  कर्मचाऱ्यांच्या प्रलंबित मागण्यांकडे जाणीवपूर्वक दुर्लक्ष केले जात आहे. अशा हलगर्जीपणामुळे दिव्यांग अधिकारी आणि कर्मचार्यांमध्ये असंतोष वाढत आहे.

संघटनेने मा. जिल्हाधिकारी यांच्याकडे विनंती केली की, वरील तिन्ही प्रमुख मुद्द्यांवर तातडीने बैठक घेऊन निर्णय घेण्यात यावा. तसेच सर्व खात्यांचे प्रमुख अधिकारी यांची संयुक्त बैठक घेऊन दिव्यांग कर्मचाऱ्यांच्या समस्यांचा स्थायी व न्याय्य तोडगा काढण्यात यावा.

निवेदन प्रसंगी उपस्थित:

जिल्हाध्यक्ष मा. श्री. संजय भाऊ बनगाळे, जिल्हा सचिव मा. किशन केणे मानेगावकर, जिल्हा कार्याध्यक्ष मा. योगेशजी मुळे, मा. धनराज सातपुतळे सर, मा. राम जाधव सर, मा. राहुल कांबळे सर, मा. भांबळे साहेब व इतर दिव्यांग कर्मचारी मोठ्या संख्येने उपस्थित होते.